Бүгүн Төрөөбүт төрүт тыл уонна сурук күнүгэр уонна И.М.Гоголев -Кындыл 95 сааһын туолар үбүлүөйүгэр аналлаах «Сарыал» култуура киинэ уонна олохтоох библиотека үлэһиттэрэ оскуола оҕолоругар «Мин төрөөбүт тылым» тыл оонньуутун олус сэргэхтик ыыттылар. Ол курдук тэрээһин бастакы чааһыгар библиотекарь Васильева В.К. саха суруйааччытын И.М.Гоголев -Кындыл олоҕун сырдатта, кэпсээтэ. Онтон салгыы тэрээһин иккис чааһыгар «Мин төрөөбүт тылым» тыл оонньуута оҕолор «Күн Ийэ», «Кыым» диэн икки хамаандаҕа арахсан хоһоон ааҕан, биктэриинэҕэ, ыйытыкка хоруйдаан, былыргы сахалыы тыллары таайан, нууччаттан сахалыы бөрөбүөттээн, саха суруйааччыларын таайан куоталастылар. Бу тыл оонньуутун ССГ Н.А.Кондаков аатын сүгэр Дьөккөн орто оскуолатын саха тылын уонна литературатын учуутала Гоголева Д.Е. уонна библиотекарь Дьяконова Е.П. дьүүллээтилэр. Тыл оонньуутун түмүгүнэн бастакы миэстэни «Күн Ийэ» хамаандата ылла(хамандыыр Абрамова Степанида) уонна иккис миэстэҕэ тигистэ «Кыым» хамаанда (хамандыыр Николаев Вадим). Кыттыбыт оҕолорго Добун суруктаах сэмэй бэлэх туттарылынна. Бары оонньууттан дуоһуйан үөрэн-көтөн тарҕастылар.
