Суббота, 13 апреля, 2024
ДомойUncategorizedСаха Өрөспүүбүлүкэтин Судаарыстыбаннаһын күнэ

Саха Өрөспүүбүлүкэтин Судаарыстыбаннаһын күнэ

Саха Өрөспүүбүлүкэтин Судаарыстыбаннаһын күнүнэн итиитик-истиҥник эҕэрдэлиибит!
Бүлүү улууһун Дьөккөн нэһилиэгэ балаҕан ыйын 27 күнүгэр, 2023 с. Саха Өрөспүүбүлүкэтин Судаарыстыбаннаһын күнүн бэлиэтээтэ.
Тэрээһиҥҥэ нэһилиэк олохтоохторо, кырдьаҕаһыттан эмэнигэр дылы дьон көхтөөхтүк кытыннылар. Ол курдук «Сарыал» култуура киинин директора Дмитриев А.И. эҕэрдэ тыл этэн туран, Дьөккөн нэһилиэгэ гаастаммытын, гаастаныы үлэтэ бара турарын бэлиэтээтэ уонна биир дойдулаахпытыгар АО «Сахатранснефтегаз» главнай инженерыгар Гоголев Александр Васильевичка, өссө төгүл нэһилиэк аатыттан махтал тылын эттэ.
Олохтоох библиотека библиотекаря Васильева В.К. эҕэрдэ тылы этэн туран, Дьөккөн нэһилиэгин чулуу уолун, Социалистическай үлэ Геройа Алексей Николаевич Черканов туһунан сырдатта. Уонна нэһилиэк библиотеката инники хайдах үлэлиэхтээҕин билиһиннэрдэ.
Дьөккөн нэһилиэгин бэтэрээн учуутала, Саха Өрөспүүбүлүкэтин общественнига Петрова Надежда Прокопьевна бар дьонун Саха Өрөспүүбүлүкэтин Судаарыстыбаннаһын күнүнэн эҕэрдэлээтэ. Саха чулуу дьонун биирдэстэрин, революционер большевик, биир дойдулаахпыт С.Ф. Гоголев туһунан аҕынна уонна кэпсээтэ.
Советскай Союз Геройа Н.А. Кондаков аатынан Дьөккөн орто оскуолатын оҕо түмсүүтүн иитиллээчилэрэ кэлэн, оскуола урукку лидера Данилова Сайаана уонна бу күн быыбарынан талыллыбыт оскуола саҥа лидера Абрамова Степанида, улахан дьонтон хаалсыбакка эҕэрдэ тылларын этэн, үөрүүлэрин үллэстэн бардылар.
Бу курдук бырааһынньык үөрүүлээх чааһын кэннэ аҕам саастаахтар атыы-эргиэн тэрийэн бэйэлэригэр үп киллэриннилэр. Оҕуруот аһыттан Саха Өрөспүүбүлүкэтин былааҕа моһуомнаах салаат астаан кэлбит дьону күндүлээтилэр.
Истиэнэҕэ ыйанар панно оҥоруутун күрэҕэр аҕыс киһи кытынна. Кыайыылааҕынан буоллулар: 1 миэстэ — Федотова Маргарита Константиновна, 2 миэстэ — Егоровтар дьиэ кэргэттэрэ, 3 миэстэ — Михайловтар дьиэ кэргэттэрэ. Манна «Ыллыкчаан» оҕо уһуйаанын оҕолоро көхтөөхтүк кытыннылар: Данилов Дьулуур, Васильева Камилла, Семенов Антон. Салайааччылар: Дмитриева М.П., Николаева Т.И.
«Ыллыкчаан» оҕо уһуйаанын иитээччилэрин уонна үлэһиттэрин профессиональнай бырааһынньыккытынан эҕэрдэлиибит!

ОСТАВЬТЕ ОТВЕТ

Пожалуйста, введите ваш комментарий!
пожалуйста, введите ваше имя здесь

Most Popular

Recent Comments