2025 сыл Арассыыйа Бэдэрээссийэтигэр Аҕа дойдуну, Саха Өрөспүүбүлүкэтигэр Ийэ дойдуну көмүскээччилэрин, Бүлүү улууһугар Гавриил Иосифович Чиряев 100 сааһыгар, Дьөккөн нэһилиэгэр Дойдуга бэриниилээх буолуу сылларыгар аналлаах Улуу Кыайыы 80 сылын көрсө уонна Сэбиэскэй Сойуус Дьоруойа Николай Алексеевич Кондаков 105 сааһыгар, Социалистическай Үлэ Дьоруойа Алексей Николаевич Черканов 115 сааһыгар аналлаах “Кыайыы Знамята” Өрөспүүбүлүкэтээҕи эстэпиэтэ Дьөккөн нэһилиэгэр олунньу ый 13 күнүгэр Кыайыы болуоссатыгар буолан ааста.
Улуу Кыайыы 80 сылын көрсөр «Кыайыы Знамята» Өрөспүүбүлүкэ үрдүнэн ыытыллар эстэпиэтэни тутан кэллилэр, Сэбиэскэй Сойуус Дьоруойа Николай Саввич Степанов аатынан үһүс нүөмэрдээх Бүлүү куоратын орто оскуола үөрэнээччилэрэ, «Эдэр патриоттар” байыаннай спортивнай кулууп туйгун кыттыылаахтара: Кэскил Семенов, Евгений Протопопов, Давид Петров. Кыайыы Знамятын “Бүлүү улууһа (оройуона)” муниципальнай оройуон депутаттарын сэбиэтин бэрэсэдээтэлэ Гаврил Семенович Корякин “Баппаҕаайы нэһилиэгэ” тыа сирин түөлбэтин баһылыга Егор Афанасьевич Николаевка туттарда. Ол кэннэ Кыайыы Занамятын Сэбиэскэй Сойуус Дьоруойа Н.А. Кондаков уонна Социалистическэй Үлэ Дьоруойа А.Н. Черканов төрөөбүт дойдуларын, “Дьөккөн нэһилиэгэ” тыа сирин түөлбэтин баһылыга Антон Иннокентьевич Михайловка туттардылар.
Кыайыы Знамята Өрөспүүбүлүкэ үрдүнэн ыытыллар эстэпиэтэ үөрүүлээх чааһыгар Бүлүү улууһун дьокутааттарын сэбитин бэрэсэдээтэлэ Гаврил Семенович Корякин, “Бүлүү улууһа (оройуона)” муниципальнай оройуонун баһылыгын социальнай политикаҕа солбуйааччы Александр Игоревич Комаров, “Дьөккөн нэһилиэгэ” тыа сирин түөлбэтин баһылыга Антон Иннокентьевич Михайлов, Сэбиэскэй Сойуус Дьоруойа Н.А. Кондаков быраата Николай Семенович Кондаков уонна Дьөккөн орто оскуолатын үөрэнээччитэ Степанида Абрамова эҕэрдэ тыллары эттилэр.
Ол кэннэ Улуу кыайыыны аҕалсыбыт биир дойдулаахтарбыт кэриэстэригэр анаан дьэрэкээн өҥүнэн курдуу бааллыбыт гирлянданы уурдулар.
Ону тэҥэ Ийэ дойду иһин сырдык тыыннарын толук уурбут биир дойдулаахтарбытын кэриэстээн, биир тэҥник сүрэхпит тэбиитин иһиллээн, сүһүөхпүтүгэр чуумпуран турдубут. Бүлүүтээҕи Росгвардия байыастара күөх халлааҥҥа холостуой ботуруоннаах саанан салгыҥҥа үс төгүл ыттылар.
Биир дойдулаахтарбыт, киэн тутар дьоммут, Сэбиэскэй Сойуус Дьоруойа Николай Алексеевич Кондаков уонна Социалистическэй Үлэ Дьоруойугар Алексей Николаевич Черканов бүүстэригэр кэлбит дьон, оҕолор сибэкки дьөрбөтүн уурдулар.
Сэрии хонуутугар охтубут, дьиэлэригэр-уоттарыгар, төрөөбүт алаастарыгар төннүбэтэх хорсун буойуннар ааттара өрүү умнуллубатын! Кыайыыны уһансыбыт ытык дьоммут өссө да өр сылларга ол уоттаах сэрии туһунан номохторо көлүөнэттэн күлүөнэҕэ кэпсэнэ турдуннар! Кыайыы Былааҕа үрдүк чопчуурга баарын тухары сэрии эргиллиэ суоҕа, өстөөх Ийэ сирбитин тэпсиэ суоҕа!
“Кыайыы Знамята” Өрөспүүбүлүкэтээҕи эстэпиэтэтэ Дьөккөн нэһилиэгэр өрөгөйдөөх чааһын түмүктээн, кэлбит ыалдьыттар уонна Кыайыы Знамятын туппут Сэбиэскэй Сойуус Дьоруойа Николай Алексеевич Кондаков аатынан Дьөккөн орто оскуолатын үөрэнээччилэрэ – Гоголев Гаврил, Николаев Вадим, Семенов Афанасий, нэһилиэк олохтооҕо, Сэбиэскэй Сойуус Дьоруойа Н.А. Кондаков быраата Николай Семенович Кондаков уонна Дьөккөн нэһилиэгин баһылыга Антон Иннокентьевич Михайлов буолан ыаллыы сытар Арыылаах нэһилиэгэр Кыайыы Знамятын бочуоттаахтык туттара айаннаатылар.
