Алтынньы ый 15 күнүгэр «Сарыал» култуура киинигэр Аан дойдуга кыргыттар уонна Саха Республикатыгар Ийэлэр күннэригэр аналлаах тэрээһин ыытылынна.
Тэрээһин сүрүн сыала: сатабылларга үөрэтии, дьоҥҥо-сэргэҕэ тарҕатыы.
Хайысхалар:
1. Сатабыллар (мастер-класс)
2. Кыргыттарга бириистээх оонньуулар
3. Айылҕа минньигэс бэлэҕэ (дегустация варенье)
Советскай Союз Геройа Н.А. Кондаков аатынан Дьөккөн орто оскуолатын үөрэнээччитэ Григорьева Кюннэй шариктан ыт дьүһүнүн оҥорору көрдөрдө. Кэлбит ылдьыттар бары көхтөөхтүк кыттан, араас майгылаах ыт дьүһүннэрин оҥорон үөрдүлэр-көттүлэр.
«Ыллыкчаан» оҕо уһуйаанын үлэһитэ Дмитриева К.А. минньигэс кэмпиэти хайдах оҥорору көрдөрдө. Кэлбит оҕолор, ийэлэр олус интэриэһиргээн, кыттыыны ылан, кэмпиэт оҥорон, киэргэтэн үөрэ-көтө сиэтилэр.
Элбэх оҕолоох ийэ, «Сарыал» култуура киинин үлэһитэ Анна Петровна Декоямова иллэҥ кэмигэр оҕуруонан араас киэргэллэри оҥорорун туһунан кэпсээтэ. Ол оҥорбут киэргэллэрин быыстапкалаата уонна оҥоһуктарын ким баҕалаахха атыылаата.
Ону таһынан ийэлэри оҕуруонан киэргэл оҥорорго үөрэттэ.
Эдэр ийэ, Дмитриева Ксения Афанасиевна «Кэрэ сэбэрэ» диэн сатабылыгар, дьахтар сирэйин хайдах бэрийэ сылдьыахтааҕын, онно туох кистэлэҥнэри туттуохха сөбүн олус интэриэһинэйдик кэпсии, кэпсии модель сирэйин кырааскалаан көрдөрдө.
Дьөккөн нэһилиэгин библиотекара Васильева В.К. библиотекаҕа кыыс оҕоҕо уонна дьахтарга аналлаах араас элбэх кинигэлэр, сурунааллар баалларын туһунан уонна ону уларсан ааҕан олоххо туһаныахтарын сөбүн быыстапкалаан туран сиһилии билиһиннэрдэ.
Тэрээһиҥҥэ бэйэлэрин сатабылларын кэпсээн, дьоҥҥо-сэргэҕэ көрдөрбүт ыалдьыттарга «Сарыал» култуура киинин аатыттан туоһу суруктар уонна сэмэй бэлэхтэр туттарылыннылар.
Түмүктүүр чааска «Айылҕа минньигэс бэлэҕэ» диэн ийэлэр аҕалбыт барыанньа араас көрүҥүн кэлбит ыалдьыттар амсайдылар. Дьөккөн нэһилиэгин күн-күбэй ийэлэрэ барыанньаны хайдах оҥороллорун туһунан ирэ-хоро кэпсэтэ, кэпсэтэ араас барыанньа минньигэс амтаннарын амтаһыйа-амтаһыйа тэрээһини түмүктээтилэр.
Тэрээһин хаартысканан видеота
