https://vk.com/wall-221485194_353
Ыллыкчааҥҥа Хомус күнэ
Бэҕэһээ биһиги «Ыллыкчаан» оҕо саадпытыгар Хомус күнэ буолан ааста. Тэрээһиҥҥэ «Сарыал» кулууп үлэһиттэрэ кэлэн олус үчүгэйдик кэпсээн, хомуска оонньоон, үөрэтэн бардылар
Ол курдук директор Айаал Ильич хомус араастарын, хайдах хомуска оонньуу үөрэммитин, Хомусчаан ансамбль тэриллибитин, ситиһиилэрин кэпсээтэ. Нэһилиэк библиотекара Варвара Кононовна убайын хомус ууһун Уйбаан Колодезников-Үрүҥ Уус туһунан, хомус оҥоруутун, ситиһиилэрин туһунан үчүгэйкээн кинигэ тахсыбытын кэпсээтэ. Прасковья Ильинична сахалар төрүт дорҕооммутун КЫЛ кырыымпаҕа оонньоон иһитиннэрдэ. Наһаа үчүгэй төрүт дорҕооммут музыкатын истэн олус үөрдүбүт. Олохтоох оскуолабыт эдэр үлэһитэ импровизатор-хомусчут Эльза Данилова хомуска наһаа үчүгэйдик оонньоон иһитиннэрдэ. Уонна Айаал Ильичтиин иккиэн хомуска дьүһүйэн оонньоон иһитиннэрбиттэрин оҕолорбут барахсаттар үөрэн ытыстарын таһынан доҕуһуоллаатылар. Бу тэрээһиҥҥэ өссө Индия, Вьетнам, Непал дойдуларын хомустарыгар оонньоон иһиттилэр. Уонна үс Дьөккөнтөн төрүттээх хомус уустарын хаартысканан көрдүлэр. Ол курдук Егор Петрович Гоголев, Петр Федотович Осипов уонна Николай Ильич Гоголев тустарынан кыратык ахтан аастыбыт, билиһиннэрдибит. Тэрээһин бүтүүтэ Айаал Ильич маастар кылаас көрдөрдө.
Саамай үөрүүлээҕэ баар оҕолорбут интэриэһиргээн олус үчүгэйдик иһиттилэр-көрдүлэр. Бүтэһигэр Ксения Дмитриева толоруутугар Хомус диэн ырыанан тэрээһин түмүктэннэ.
Тэрээһиҥҥэ кыттыбыт «Сарыал» кулууп үлэһиттэригэр Айаал Ильичкэ, Прасковья Ильиничнэҕэ, Варвара Кононовнаҕа уонна оскуола эдэр учууталыгар Эльза Павловнаҕа махталбын биллэрэбин, ситиһиилэри, этэҥҥэ буолууну баҕарабын!
Дьөккөнтөн Альбина Ионовна
https://vk.com/wall-221485194_354
Бүлүүгэ Хомус күнүн бэлиэтээтибит.
«Дьүрүһүй Бүлүүм хомуһа» диэн хомус күнүгэр аналлаах хомусчуттар күрэхтэригэр «Хомусчаан» хомус муусукатын оҕолоро кытыннылар. Салайааччы Данилова Э.П.
Күрэххэ 70-ча киһи кытынна. Оҕолорго биирдиилээн хомусчуттарга Советскай Союз Геройа Н.А. Кондаков аатынан Дьөккөн орто оскуолатын үөрэнээччилэрэ Нида Абрамова — 1 миэстэ, Миша Федоров — 3 миэстэ буоллулар. Бөлөҕүнэн толорууга «Хомусчаан» хомус муусукатын ансаамбыла 1 миэстэ буолла. Улахан дьоҥҥо биирдиилээн толорууга Эльза Данилова 2 миэстэ буолла.
Дмитриев А.И., хомусчут импровизатор, кэлбит дьоҥҥо хомус тардыытыгар маастар кылаас ыытта.
