Бүгүн, 17.02.2025, биһиги Дьөккөммүтүгэр Правительство 2024 сыллааҕы отчуотун Правительство бэрэссэдээтэлин солбуйааччы Сергей Васильевич Местников уонна кинини кытта кэлбит делегация туруорда. Бастаан Сергей Васильевич 10 аҥар ааһыыта эрдэ кэлбит буолан дьаһалтаҕа нэһилиэкпит олоҕун-дьаһаҕын, историятын нэһилиэк баһылыга Антон Михайлов билиһиннэрдэ. Ол кэнниттэн Лүксүгүн учаастагар баран ыытылла турар үлэни, производствоны, үлэни-хамнаһы хаһаайыстыба салайааччыта Сидор Ионов билиһиннэрдэ Тахсыбыт бородууксуйаны Иван Ионов амсатта. Ол кэннэ сүүрүк сылгылар турар конюшняларыгар кэлэн кыстаан турар сүүрүк сылгылары уонна таска кыстаан турар саха сылгыларын тренер Дуйаана Архипова көрдөрдө, кэпсээтэ. Ол кэннэ Советскай Союз Геройа Н.А.Кондаков аатынан оскуоланы оскуола учебнай завуһа Светлана Прокопьева билиһиннэрдэ уонна музейы история учуутала Александр Катанов көрдөрдө.
Онтон дьэ 14 чаастан оруобуна мунньах саҕаланна. Бастаан ыытыллыбыт үлэ туһунан видеокиинэ көрдүбүт. Онтон сүрүн отчуоту Правительство бэрэссэдээтэлин солбуйааччы Сергей Васильевич 37 мүнүүтэ устата салааларынан тус-туһунан кэпсээтэ. Ол кэннэ боппуруостарга киирдибит. Бастакынан мин ППМИ программатыгар тоҕо хапсыбатахпытын чуолкайдастым. Конкурс протокола ыытыллыбат буолан ханнык критерийга мөлтөөбүппүтүн билиэх баҕа санаа баһыйда. Иккиһинэн нэһилиэк землеустроителэ Никита Иванов бултуур угодье кэһиллиитин туһунан боппуруос биэрдэ, Сидор Ионов Лүксүгүн учаастагын гаастаныытын, өртөөһүнү ыытыы туһунан уонна Бүлүү бөлөх оройуоннарга АГРОФОРУМ-сүбэ мунньах ыытыы туһунан этиннэ. Кулууп директора Айаал Дмитриев кулууп ханнык программанан тутуллуоҕун туоһуласта. Оскуола 9 кылааһын үөрэнээччитэ Нида Абрамова Советскай Союз Геройа Н.А.Кондаков Саха көрдөрөр-иһитиннэрэр хампаанньаҕа кини аатын иҥэриини туруоруста. Кинини бигэргэтэн оскуола директора Андрей Гоголев эмиэ ити боппуруоска этиннэ, сурук, илии баттааһынын биэрдэ. Иккиһинэн Андрей Гоголев үлэлии кэлэр специалистарга олорор уопсай кыһалҕатын этиннэ, тутарга туруоруста. Нэһилиэк баһылыга Антон Михайлов Дьөккөн спортивнай нэһилиэк буоларын этэн туран спортзал тутуутун этиннэ. Иван Ионов тыа хаһаайыстыбатыгар үлэлиир хаһаайыстыбаларга оздоровление (Чэбдигирдии) программата тохтообутун, харчы кэлиитэ 20% кэллэҕинэ хаһаайыстыбаларга охсуулаах буолуоҕун этиннэ.
Мин буоларын курдук кыра нэһилиэктэр боппуруостарын анал программа ылыллыбатаҕына боппуруос ыарыаҕын, оҕо саадтарыгар САЙДЫЫ точкалара (Точка роста) эмиэ баар буолуоҕун туһунан, тыа хаһаайыстыбатыгар специалистар технологтар, зоотехниктар, бухгалтердар тиийбэттэрин, саҥа ГОСТ киирбитинэн балаһыанньа уустугуруоҕун этинним, болҕомтоҕо ылалларыгар көрдөстүм.
Улууспут баһылыга Сергей Николаевич, отчуоту туруорбут Сергей Васильевич Местников уонна кэлбит специалистар киирбит боппуруостарга эппиэттэрин иһиттибит.
Мунньах түмүгэр нэһилиэкпит ветеринарыгар Николай Николаевич Гоголевка өр сыллаах үлэтин сыаналаан Правительство бэрэссэдээтэлин ГРАМОТАТЫН туттардылар. Мунньах уопсай хаартыскаҕа түһүүнэн түмүктэннэ.
