Олунньу 27 күнүгэр Дьөккөн нэһилиэгэр Арассыыйаҕа Аҕа дойдуну, Саха Өрөспүүбүлүкэтигэр Ийэ дойдуну көмүскээччилэрин, Бүлүү улууһугар Г.И. Чиряев уонна Дьөккөн нэһилиэгэр Дойдуга бэриниилээх буолуу сылларын арыйар үөрүүлээх күнэ буолан ааста.
Сыл арыллыытыгар аналлаах Сэбиэскэй Сойуус Дьоруойа Н.А. Кондаковка, Социалистическай Үлэ Дьоруойа А.Н. Черкановка, Г.И. Чиряевка, биир дойдулаахтарбыт — Дьоруой Ийэ, тыыл бэтэрээнэ, норуот маастара М.К. Кондакова — 100 сааһа уонна мелодист, ырыаһыт В.Д. Соколов — 60 сааһа үбүлүөйдээх сылларыгар уонна анал байыаннай дьайыыга дойдутун чиэстээхтик көмүскээн олохтон туораабыт биир дойдулаахпыт С.А. Михайловка аналлаах быыстапкалары, нэһилиэк көҕүлээһининэн тэриллэн көрүүгэ турда.
Быыстапка кинилэр олохторун-дьаһахтарын, үлэлээн ааспыт кэмнэрин, үрдүк ситиһиилэрин көрөөччүгэ, үүнэн эрэр көлүөнэҕэ толору тиэртэ дии саныыбыт.
Ону тэҥэ сыл арыллыытын үөрүүлээх чааһыгар «Дьөккөн нэһилиэгэ» тыа сирин түөлбэтин баһылыга А.И. Михайлов — А.Н. Черканов туһунан, Сэбиэскэй Соуус Дьоруойа Н.А. Кондаков аатынан Дьөккөн орто оскуолатын дириэктэрэ А.А. Гоголев — Н.А. Кондаков туһунан, «Ыллыкчаан» оҕо уһуйаанын сэбиэдиссэйэ А.И. Ионова уонна ыалдьыт Томская Мария Петровна, анал байыаннай дьайыы кыттыылаахтарыгар уонна кинилэр дьиэ кэргэттэригэр «Бүлүү улууһа эһигинниин бииргэ» диэн улуустааҕы көмө оҥорор пуун кыттыылаахтара (8 киһи) — Анал байыаннай дьайыыга сылдьар биир дойдулаахтарбытыгар көмөлөрүн туһунан, нэһилиэк библиотекаря В.К. Васильева — Г.И. Чиряев туһунан, «Сарыал» култуура киинин дириэктэрэ А.И. Дмитриев — үбүлүөйдээх сыллаах М.К. Кондакова, В.Д. Соколов тустарынан көрөөччүлэргэ кэпсээтилэр, билиһиннэрдилэр.
Нэһилиэк олохтоохторун күүстэринэн анал байыаннай дьайыыга сылдьааччыларга хомуллубут үбү уонна кинилэргэ анаан ыһаарыламмыт дойдубут балыгын хомуйуу туһунан А.И. Ионова сиһилии кэпсээтэ, билиһиннэрдэ. Анал байыаннай дьайыыга сылдьар биир дойдулаахтарбытыгар күүс-көмө буоларга Тэбиилээх буордаах Дьөккөн нэһилиэгин олохтоохторо биир санааҕа киирэн, түмсүүлээхпитин көрдөрдүбүт.
«Бүлүү улууһа эһигинниин бииргэ» диэн улуустааҕы көмө оҥорор пуун анал байыаннай дьайыыга сылдьааччыларга аналлаах кэтэр таҥастарын, туттар малларын, саһар сиэткэлэри бэйэлэрин көмүс илиилэринэн тигэн, быыстапкалаан үлэ үгэнигэр сылдьалларын сиһилии кэпсээн, кэлбит нэһилиэк олохтоохторун биһирэбиллэрин ыллылар.
Сыл арыллыытын үөрүүлээх чааһын култуура эйгэтигэр күүс-көмө буолар нэһилиэк олохтоохторо ырыанан уонна үҥкүүнэн киэргэттилэр.
